Jer 13 | MEU | STEP | Iehova ese ini e hamaorogu toma: Aola, riorio dabuana aukana ta ba hoia, bena ba rioa, ranu ai basio urua diho.

Jeremiah 13

Hereva heḡereḡerena: Riorio dabuana e mouka-mouka

1 Iehova ese ini e hamaorogu toma: Aola, riorio dabuana aukana ta ba hoia, bena ba rioa, ranu ai basio urua diho. 2 Taunabunai lau ese riorio dabuana ta na hoia, Iehova ena hereva heḡereḡerena, bena na rioa. 3 Bena nega iharuana Iehova ena hereva na egu ai e kau, eto, 4 Vada o hoia bona o rioamu dabuana avabia, ba tore isi, Eufrate sinavaina baola, unuseni ai nadi kohua-kohuana ta ai ba hunia. 5 Taunabunai lau nala, Eufrate sinavaina badibadinai na hunia, Iehova ese e haganigu heḡereḡerena.

6 Dina hoho muridiai Iehova ese ma e hamaorogu, eto, A tore isi, Eufrate sinavaina baola, vada na haḡanilaimu bena unuseni ai o hunia dabuana na unu amo ma bavabia lou. 7 Bena Eufrate sinavaina nala, tano na ḡeia, hari riorio dabuana na na hunia gabuna amo ma na abia. A na itaia, una norio dabuana vada e mouka-mouka; ia na negenege ḡauna mo.

8 Bena Iehova ena hereva na egu ai e kau, eto, 9 Iehova ini e gwau tomamu: Lau ese Iuda ena heaḡi bona Ierusalem ena heaḡi-bada na ene baina hadikadia toma. 10 Ina kara dika besena, egu hereva ikamonaidia asie uramu to sibodia edia lalo-hadai e ḡavadiamu mai lalo-aukadia ida, bona dirava idaudia muridia amo e laomu, isiaidia bae lao heni bona bae toma henidia diho totona, taudia na ina riorio dabuana, negenege ḡauna, heḡereḡerena ai baela. 11 Badina be riorio ḡauna na tau ta koekoena ai e herio kunuka-kunuka na heto, lau ese Israel besena idoinai bona Iuda besena idoinai na koekoegu ai na riodia kunuka-kunuka, egu ai bese ta bona lada ta bona heimodai ta bona hairai ta ai bema lao; a idia na asie ura bae kamonai. Iehova na e herevamu.

Hereva heḡereḡerena: Vine ranuna hodudia

12 Ina hereva ba hamaorolaidia, baoto, Iehova, Israel Diravana, na ini e gwau tomamu: Hodu iboudiai na vine ranuna ai bae honu. Bena bae haere henimu, baeto “Ai na asi dibamai hodu iboudiai na vine ranuna ai bae honu a?”. 13 Bena ba hamaorodia, baoto, Iehova ini e gwau tomamu: A itaia, lau ese ina tano inoholaina taudia iboudiai na baina hakekerodia vaitani - pavapava, David ena terono ai e helaimu taudia, bona hahelaḡa taudia, bona peroveta taudia, bona Ierusalem inoholaina taudia iboudiai. 14 Bena baina huaridia, ta ta, tama bona natuna, tama bona natuna, bae hehuari heheni. Basina bogadia hisi, basina hamauridia, ihabua-taridia ai basina bogalaidia. Iehova na e herevamu.

Iuda ena lalo-auka davana

15 A kamonai, taiamui a hakala, basio hekokoroku;
badina be Iehova vada e hereva.
16 Iehova, emui Dirava, ba imodaia,
ia ese tano do se hadiburaiamu negana ai,
ororo do asie vabura-vabura
bena aemui do asie hetutuhi negana ai,
diari ba tahua a ia ese vabura ai baine halaoa
bona dibura masemase baine havaraia
negana do se kau ai,
ia ba imodaia.
17 A basioma kamonai,
bena lalogu baine tai hehuni, emui hekokoroku dainai;
baina tai dikadika, iruru-matagu bae diho,
badina be Iehova ena mamoe serina na vada e abia mauri.

18 Hanua pavapavana mai sinana ida ba hamaorodia,
baoto: Henu ai ba helai;
badina be emui havava ḡauna herea-daena na
kwaramui amo vada eme heabi oho.
19 Diho kahana hanuadia vada e hekou ahu,
asi ikehodia tauna ta;
Iuda taudia iboudiai na vada e laohaidia, gabu daudau ai vada e hanohodia;
vada e laohaidia vaitani.

20 Matamui a gaga isi,
mirigini kahana amo e maimu taudia ba itadia.
Mamoe serina, e henimu ḡauna, na edeseni ai?
Emu mamoe serina herea-daena be edeseni ai?
21 Emu ai vada o hamanadadia
bona turamu ai vada o halaodia taudia na
ikwaramu taudia ai bae halaodia negana ai,
ede ba hereva toma?
Hisihisi ese basine gugubamu,
hahine ena hekamonai hisidia na heheto, a?
22 Bena lalomu boma tahua, boma toma
“Dahaka dainai ini ḡau na latagu ai vada e kau?”;
emu kara dika bada-hereana dainai ramimu vada e abia isi,
bena vada e hadikamu.

23 Etiopia tauna ese kopina baine ha-idaua,
eiava taiga ese kopina toutouna baine ha-idaudia, a?
Bema unuheto, umui kara dikadia vada o manadailai taumui ese
kara namodia ba kara diba.
24 Lau ese baina hakarohomui rohoroho,
lai tano ḡaḡaena amo ese uit momodia e oda ohomu na heto.
25 Iehova na e tomu: Oi ahumu binai,
vada na hahetoho henimu ḡauna;
badina be vada o lalogu boio,
bona hereva koikoidia vada o abidadama heni.
26 Lau sibogu ese vairamu ramina baina abia isi,
bona emu hemarai badina baine hedinarai.
27 Emu kara dika-rohorohodia vada na itadia,
emu heuda-hanai bona emu tubebe,
bona emu lebulebu karadia ororo gabaedia ai.
Ierusalem e, madi ihabaimu!
Ela bona edena nega ai ba haheḡoeva?